Instalado de Java

Kiam vi havas la Java-dosieron en iu dosierujo de via fiksa disko, ekrulu ĝin alklakante dufoje ĝian nomon. Tio ekrulos programon kiu zorgos pri instalado de Java. Tiu programo vidigos kelkajn ekranojn kie oni postulos de vi elekti inter du aŭ pli da opcioj. Vi devos nur daŭre akcepti la defaŭltajn opciojn (t.e. tiujn kiuj jam aperas aŭtomate elektitaj).

Se la instalada procezo sukcesis vi trovos novan dosierujon, nomatan j2sdk1.4.2_03 (aŭ simila), en via fiksa disko C: .

(La dosierujo jdk1.3.1 kiu aperas en la supra bildo restis en la fiksa disko el antaŭa instalado de malnova versio de Java.)

Ĉu vi volas testi la ĵusfaritan instaladon?

(Se vi nenion scias pri la DOS-fenestro, bv. transpasi tiun ĉi teston, ĝi ne gravas kaj ni lernos pri DOS-fenestro poste en la paĝo 10). Vi povas fari simplan teston: malfermu DOS-fenestron kiu ebligas tajpadon de komand-linio, difinu kiel aktualan la dosierujon C:\j2sdk1.4.2_03\bin (aŭ similan) uzante la DOS-komandon CD (el la angla "Change Directory", t.e. ŝanĝu dosierujon). Post la invito kiu aperos en la komenco de nova komand-linio sur la ekrano, tajpu la komandon javac ; jena estos la fina enhavo de tiu linio:

C:\j2sdk1.4.2_03\bin>javac

Java- tradukilo devus ruliĝi mallonge kaj skribi ĉ. 15 liniojn de instrukcioj pri tio, kiel uzi ĝin. (Detaloj pri tio, kiel uzi Java-tradukilon aperos poste en tiu ĉi ĉapitro).