Java: kio estas tio?

Ĉi-apude vi trovas la emblemon de la programlingvo Java. Vi tuj povas identigi la tason da vaporiĝanta kafo kiu fariĝis ĝia grafika logobildo. La programlingvo Java, kies originala nomo estis "Oak" (kverko), evoluis kiel parto de la projekto "Green" kiu komenciĝis en 1991 ĉe la usona komputila firmao Sun Microsystems. La nomo Java estis hazarde elektita fare de la teamaj membroj dum teknika neformala diskuto okazinta en kafejo. Ekde 1995 Java fariĝis laŭgrade unu el la plej gravaj programaraj rimedoj en la nuna komputila industrio.

Sun Microsystems multe investis por evoluigi kaj disvastigi Java-teknologion sed la sukceso de Java rezultas ĉefe el la fakto, ke ĝi tre kontentige respondas al gravaj postuloj de la nuna programara industrio.

La programlingvo Java:

1. Provizas programistojn per taŭga maniero programi Interreton.
2. Enhavas bonajn ilojn por sekureco.
3. Estas sufiĉe proksima al la tre konata programlingvo C++, sekve facile anstataŭas ĝin.
4. Ebligas facilan interagon kun uzantoj aparte en aplikoj por Interreta komerco.

Tiu kurso postulas, ke en via komputilo estu instalita la programaro "Java Development Kit (JDK)" kaj simpla teksto-redaktilo (ekz. Notepad de Vindozo). Kompreneble, vi povos uzi pli alte disvolvitan Javan medion se vi havas tian je dispono. En la venontaj paĝoj vi lernos kiel akiri Java-programaron kaj instali ĝin en via komputilo.